.jpeg)
رواية انا وابن خالتي الفصل التاسع 9 بقلم عمرو راشد
متصدقيش حد فيهم يا هند،، دول ولا واحد فيهم يبقا جوزك.. ادخلي الأوضة بسرعة لحد ما اجيلك
= مروان انت عرفت ازاي اني برا الأوضة؟
وهو مين قالك اني مروان يا هند؟؟
" بعدها سمعت صوت ضحكة مرعبة خرجت من السماعة بعدها المكالمة فصلت،، بس الاتنين اللي معايا لسة موجودين وشايفاهم،، مروان اللي كان واقف قدامي كان لسة واقف بنفس ابتسامته وقالي
قررتي ايه؟
= سيبوني في حالي،، سيبوني في حالي بقا
انتي اللي بدأتي يا هند،، احنا رد فعل مش اكتر
= وعايزين مني ايه؟
مش عايزين حاجة،، من امتا واحنا بنحتاج حاجة من اهل الارض،، انتو اللي طول عمركو بتحتاجونا
= بس انا معملتش حاجة
كون ان هارون يحبك دي في حد ذاتها جر*يمة عندنا ومتنسيش انك أنتي اللي حضرتي هارون
= مش انا،، انا معملتش حاجة
لا عملتي يا هند و دلوقتي جه وقت العقاب
" الابتسامة اللي كانت على وشه اختفت،، كشاف الموبايل فصل.. مبقتش شايفة أي حاجة،، فجأه حسيت ان حد مسك ايدي بقوة شديدة.. بدأت اصرخ،، اصرخ بأعلى صوتي لحد ما فجأه المشهد اتغير ولقيت نفسي نايمة على السرير في بيت خالتي،، قومت مفزوعة وساعتها لقيت مروان دخل عليا وفتح النور
مالك يا حبيبتي في ايه؟
= ملكش دعوة،، اطلع برا
اهدي طيب وفهميني حصل ايه
= بقولك اطلع برا وسيبني في حالي بقا،، سيبني في حالي،، ارحمني
اللي تشوفيه يا هند
" خرج وقفل الباب وراه،، بدأت آاخد نفسي و أحاول افوق بعدها قومت من السرير،، كنت حاسة اني تعبانة وجسمي كله واجعني،، وايدي بالذات وجعاني اوي،، بس لما بصيت عليها عرفت السبب،، ايدي كان لونها احمر وعليها آثار ايد ل شخص،، يعني ايه،، يعني دا كان حلم ولا حقيقة ولا ايه انا مش فاهمة حاجة،، بس ازاي مش حلم وأنا لسة في بيت خالتي يعني انا كدا مرجعتش بيتي اصلا،، كنت واقفة قدام المراية ساعتها ولقيت باب الأوضة بيخبط،،
ادخل
" لقيت خالتي دخلت،، مشيت من قدام المراية و روحت قعدت على السرير وهي جات قعدت جنبي
مالك يا هند؟
= مفيش حاجة انا كويسة
وانا مش عارفاكي بقا؟
= مفيش حاجة يا خالتي ولو سمحتي سبيني دلوقتي
يا هند دا أنا اللي مربياكي،، انتي كنتي بتقعدي معايا أكتر ما بتقعدي مع امك،، احكيلي مالك يا حبيبتي،، فيكي ايه
= تعبانة يا خالتي،، تعبانة أوي،، حاسة اني متلخبطة وتايهة،، مش فاهمة أي حاجة بتحصل حواليا
وكل دا سببه ايه؟
= مش هكدب عليكي،، انتي السبب في كل دا يا خالتي بس برضو انا حاسة اني توهت بعده
بعد مين؟
= هارون
يخربيت هارون وسنين هارون السودا،، انسيه بقا يا هند،، يا حبيبتي هارون دا مش مننا مينفعش تبقي بتفكري فيه بالشكل دا،، مينفعش يا هند لازم تفوقي لنفسك،، يا حبيبتي هارون دا احنا اللي عملناه
= اصلك مشوفتيهوش يا خالتو،، مشوفتيش كان بيعمل عشاني ايه؟،، لحد اخر لحظة وهو عايز يحميني بأي شكل
ماشي وانا معاكي وهصدقك بس اخرتها ايه،، تفتكري لو مروان عنده نفس القوة اللي عند هارون دي كنتي هتفكري تحبي هارون أصلا؟؟،، مروان ميستاهلش منك اللي بتعمليه دا يا هند،، انا اه مكنتش بحبه بس بجد هو صعبان عليا من اللي عملته فيه وصعبان عليا اكتر من ان الشخص الوحيد اللي المفروض يبقا جنبه بيفكر في حد تاني،، راجعي نفسك يا هند
= انا عايزة اقابل الشيخ قاسم
اشمعنا
= محتاجة اتكلم معاه
قولي ل جوزك الاول ونروح
= انا عايزة اروح لوحدي
لوحدك!
= اه لوحدي
حاضر هقولك العنوان
" قومت غسلت وشي وغيرت هدومي وخرجت من الاوضة لقيت مروان قاعد مع بودي في الصالة
انا نازلة
" بص ليا وقالي
رايحة فين
= نازلة هشتري شوية حاجات
حاجات!!،، طب استني انزل معاكي
= لا خليك مستريح،، انا مش هتأخر
" نزلت و روحت على العنوان،، دخلت البيت وسجلت اسمي وفضلت قاعدة مستنية دوري لاكتر من ساعة ونص وبعدها دخلت
اهلا
= انا محتاجالك
بس انا مش هعرف اعملك حاجة
= ليه
انتي اللي لازم تساعدي نفسك يا هند،، انا قدمتلك كل حلول المساعدة من عندي لكن لازم انتي اللي تكملي
= بس انا مش عارفة اعمل حاجة
عشان اتعودتي ان في حد هو اللي بيعملك كل حاجة و دا مش صح
" كشفت ايدي قدامه
و دا؟،، دا ايه؟
= ايه دا؟
" بدأت احكيله الحلم بالتفصيل،، كان بيسمع بإهتمام ومركز في كل كلمة بقولها وبعد ما خلصت ابتسم وقالي
قولتلك هما هيلعبو معاكي وانتي مسمعتيش الكلام،، خدي بالك دي لسة بداية
= طب وأنا اعمل ايه
زي ما قولتلك شغلي قرآن في البيت طول اليوم وصلي يا هند،، انتي حاليا قدامك ما بين انك تديهم فرصة انهم يلعبو بيكي اكتر او انك تطرديهم خالص من حياتك
= ممكن اسألك على حاجة
مش هيرجع يا هند،، هارون مش هيرجع،، انسيه وعيشي حياتك اللي أنتي ملحقتيش تتهني بيها سواء انتي او جوزك
#بقلم: #عمرو راشد
" رجعت من عنده زي ما روحت،، محدش عايز يفهمني ولا يفهم انا حاسة بإيه،، مضطرة أنا اللي اتعامل مع كل حاجة لوحدي،، مضطرة أنا اللي اشيل واتحمل غلط غيري بس لحد امتا،، رجعت البيت ملقتش حد في الصالة على عكس العادة،، دخلت اوضتي لقيت مروان قاعد على السرير وبيقلب في التليفون بتاعه،، قربت منه
هتفضل زعلان كدا كتير؟
= انا مش زعلان
ماهو باين عليك
" قعدت جنبه وطبطبت عليه
انا اسفة متزعلش مني،، انا بس مرهقة شوية اليومين دول،، وحياتي عندك ما تزعل
= وحياتي عندك أنتي تعالي نروح ل دكتور نفسي
بس انا مش مجنونة يا مروان
= يا هند انا وكل اللي حواليكي مستغربين تصرفاتك،، انتي بتتكلمي عن ناس وبتشوفي حاجات مش موجودة.. دا غير احلامك اللي بتصحي مفزوعة منها،، كل دا يأكد اننا محتاجين دكتور
وليه ميكونش نفسيتي تعبانة شوية ومحتاجة راحة
= تحبي نسافر؟
نعمل أي حاجة بس متبقاش انت الشخص اللي تيجي تقولي حاجة زي دي وتحسسني اني مش طبيعية أو أني اتجننت
= انا بقول كدا عشان خايف عليكي يا هند
خايف عليا!!،، للأسف انت مش فاهم حاجة يا مروان
= فهميني انتي
عمرك ما هتفهم بس خلاص تمام هي فترة وهتعدي وكل حاجة هترجع زي ما كانت متقلقش
" قومت غيرت هدومي بعدها طفيت النور عشان ننام ولكن انا منمتش اليوم دا من كتر العياط،، مروان بقا شايفني مجنونة وأنا لحد اخر لحظة كنت بفكر فيه ومختارتش هارون على حسابه،، مبقتش عارفة الغلط منه ولا مني،، مش عارفة اعذره ولا ايه اللي المفروض اعمله،، بس الحاجة الوحيده اللي انا متأكدة منها ان مفيش حاجة هترجع زي الاول،، انا و مروان حياتنا انتهت،، الشمس طلعت وانا لسة صاحية،، لحد الساعة 8 الصبح بعدها نمت من التعب،، فوقت على الساعة 4 العصر ملقتش مروان جنبي،، قومت خرجت من الأوضة لقيت خالتي قاعدة في الصالة
صباح الخير يا حبيبتي.. يلا ادخلي اغسلي وشك وتعالي افطري عقبال ما نحضر الغدا
= هو مروان فين؟
نزل هو وبودي
= هو وبودي!!
اه بودي خده عشان يخرج ويشم هوا بدل قعدة البيت دي
" اهي دي بالنسبالي اغرب حاجة في الحكاية الغريبة دي كلها.. بودي و مروان مع بعض وخارجين كمان،، ربنا يستر،، قعدت وفطرت و بعدها حضرنا الغدا وفضلنا مستنيين ساعة واتنين،، بعدها اتصلت ب مروان ولكن مردش،، خالتي قررت تتغدا هي اما انا كنت مستنية مروان،، فضلت قاعدة للساعة 10 وبرضو مجاش ولا حتى رد على مكالماتي لحد ما عنيا غفلت وأنا قاعدة على الكنبة ،، صحيت على صوت باب الشقة وهو بيتفتح،، بصيت في الساعة لقيتها 2 بعد نص الليل،، دخل مروان وهو بيغني وبيضحك
هند حبيبتي
= كنت فين يا مروان لحد دلوقتي؟
انا كنت في الجحيم
= نعم؟؟؟
الليلة كانت جحيم
= مالك يا مروان ما تتكلم كويس و بعدين مالك واقف مش مظبوط كدا ليه
ليه بس ماانا زي الفل اهو
= هو انت شارب حاجة؟
" رد عليا وهو بيضحك ومش قادر يمسك نفسه
انا شربت حش*يش يا هند!!!
#عمرو_راشد
#انا_وابن_خالتي 9
#يتبع
